Uncle Kerei James Mihi
E nga iwi, e nga whanaunga, huri noa i te motu, tena ano hoki koutou katoa.
Ko te mea tuatahi ano hoki, ko te whakawhetai atu ki a Io Matua Kore mona e tiaki neki e manaaki neki hoki i te iwi huri noa i te ao. Naana nei hoki i poupou te ira tangata ka puta te tangata ki runga i te mata o te whenua, ka timata te hora katoa o te tangata i te ao, koia ka mihi atu ki a ia. I tua atu i teena, me mihi ake hoki, ki a Ranginui raaua ko Papa-tu-a-Nuku me a raaua tamariki, nga kai tuku iho i nga taonga katoa e ora ai te tangata ki runga i te mata o te whenua.
Ka huri atu hoki nga mihi ki a ratou kua riro atu ki te ao wairua, kua whakawhiti atu ratou ki tua o Paerau, ki Tapokorau, ki Matangireia, ki Taawauwau, ko tae atu raa, ratou ki te ao wairua, ki ko hoki, i a Io Matua, ki te huinga o te kahurangi, hoi ano ra te korero, noho ahuru mai ratou i reira. Apiti hoono, taatai hoono, ko ratou, te hunga wairua ki a raatou, ko taatou te hunga mahue iho ki a taatou. Koia ra ka huri ake nga mihi ki a taatou, e kekeri nei kia neke tonu taaatou me a taatou whaanau, ahakoa noa atu nga taimahatanga i etahi wa. Engari ahakoa noa atu ena aahuatanga katoa ko te mea nui ke, kia u taatou ki to taatou whanaungatanga, te mahitahi me te awhina tetahi i tetahi, kia tika hoki te whakatauki ra, he aha te mea nui o te ao, he tangata, he tangata, he tangata. No reira ko mutu ake enei pitopito korero ki konei, noho ora mai i o taatou kaainga maha, ma Te Atua tatou e tiaki, e manaaki i roto i nga hemanawatanga, nga piki me nga heke.
Kerei James
Page last updated 7 Oct 2008
